"Andskotans drasl 2007"

Mér finnst Finnar dásamlegir, þeir eru svo kaldhæðnir og fyndnir.  Hef í gegnum vinnu mína kynnst mörgum Finnum og finnst þeir mjög fyndnir.  Um helgina las ég í morgunblaðinu að Tommi Huotari kastaði farsímanum 82,62 metra á áttunda farsímakastmótinu sem fram fór í Nyslotti í Finnlandi og sigraði þar með.  Þetta finnst mér sniðugt og  vel farið með tímann sinn.  Í staðinn fyrir að pirrast ógurlega þegar tæknin virkar ekki þá bara að slá þessu uppí kæruleysi.  En þetta er bara byrjunin, ég auglýsi hér með eftir þáttakendum í móti sem ég er að skipuleggja á Laugardalsvelli og verður haldið 1.desember næst komandi.   Leikarnir munu heita "anskotans drasl 2007".  Allir eru velkomnir að skrá sig og eru flokkarnir þrír.  Konur og menn yngri en 25 ára, konur og menn yngri en 45 ára og konur og menn eldri en 45 ára.  Keppt verður í eftirfarandi greinum.  

Farsímakast -  Þáttakendur taka fimm metra tilhlaup og kasta farsíma sínum eins langt og pirringur þeirra nær.    Undanúrslit laugardaginn 1.des vodafonekastið og úrslit sunnudaginn 2.des Símadeildin. 

Digital Ísland íshokkí - Þáttakendur keppa á litlum völlum 5 x 5 m2, einn á móti einum.  Einn myndlykill er með í leiknum en tvær fjarstýringar.  Keppendur eru með sína íshokkíkylfuna og reyna að skora hjá hvor öðrum, þegar þeir skora þurfa þeir að ná í fjarstýringuna og stilla stöð 2 plús inná myndlykilinn áður en hann er tæmdur úr markinu.   Keppt verður í riðlum og fer fjöldi þeirra eftir skráningarfjölda.  

Bílhurðarkringlukast - Mjög auðveld grein.  Keppendur taka bílhurð sem ekki hefur opnast í frosthörkunum af hjörum og snúast í hringi með hana og sleppa á réttu augnabliki svo hún svífur sem lengst.   Til þess að meiga keppa í þessari grein þurfa keppendur að hafa bílpróf og vera með allaveganna þrjár nótur uppá kaup á einskynsverðri lásaolíu.  Keppt verður báða dagana.

50 m windows hlaupið - Já hið vinsæla windows hlaup verður endurvakið í Laugardalnum.  Keppendur hlaupa með sex harða diska bundna um ökklana á sér afturá bak 50 metra.  Hver harður diskur er með windows stýrikerfi, svo sem Vista, XP, 95, 98, millenium, og windows 2000.  Sá er kemur fyrstur sigrar.  ATH: erfiðari grein en maður gerir sér grein fyrir.   

Fleiri greinar munu verða kynntar á næstu dögum og opnað er fyrir skráningu núna.  Notið commentakerfið.  Athugið þið meigið aðeins skrá ykkur í tvær greinar og er skráningagjaldið 2500 fyrir hverja grein.  Skráningagjaldið þarf að komast til skila með heimsendingarþjónustu póstsins sem er eins konar próf á hvort þið getið tekið þátt, því eins og allir vita þá virkar heimsendingaþjónusta póstsins ALDREI og er of heimskulegt fyrirbæri til að setja í íþróttagrein. 

 

Athugasemdir

[Jenný Anna Baldursdóttir, 27.8.2007 kl. 12:45]

Hahaha, ég dey en skrái mig í allar greinar. 

[Halldóra Halldórsdóttir, 27.8.2007 kl. 13:14]

Loksins komin fram íþróttagrein sem ég hef skilning á.

[Guðbjörg (IP-tala skráð) 27.8.2007 kl. 15:45]

bilaði síminn í morgun?

Það fer þér einstaklega vel að pirrast.

 

[Halldór Sigurðsson, 27.8.2007 kl. 20:13]

Og , þú ert ekki á lyfjum ????

[Sigrún, 27.8.2007 kl. 20:45]

Ok ég get sko innilega tekið þátt í windows dæminu! Bara að skrá þessa athugasemd í #$"%&$ Vista kerfið tók heila eilífð! KRÆST. Ég get stungið upp á ,,neitunarbréfadreifingu,, sem nýja íþróttagrein. En hún felst í því að þeyta neitunabréfum við vinnum sem maður hefur sótt um eins langt út á hafsauga og hægt er ....svo er alltaf spurning hvort góð geðheilsa sé í verðlaun eða bara pillur til að laga ástandið hahahahhahahahah.

[thor (IP-tala skráð) 28.8.2007 kl. 12:29]

ja hérna,  hugmyndir þínar, þær fara ekki

troðnar slóðir

[Birna Gunnarsdóttir (IP-tala skráð) 28.8.2007 kl. 14:02]

Sting uppá Visa-reikningaáti. Visa greiðir reikninga sigurvegarans. Muna að taka ljósrit af reikningunum fyrir átið. Spurt er hvað kemur það Andskotans drasli 2007 við. Jú flest er þetta orðið drasl þegar borgað er, ekki satt ?.

[Garún, 28.8.2007 kl. 15:14]

Birna....Þetta er allt tengt andskotans drasli 2007. Ég sting uppá að átið verði í tveimur hollum, undan og úrslita keppni. Fyrst er það venjulegt Visa-reikningakappát, síðan næsta dag Firma keppni með Visa-Raðkappáti.

Einnig er ég líka að fíla nettengingarpirringssnúsnú sem hóp íþrótt og nettengingarpirringssippó sem einstaklingsíþrótt.

Endilega komið með fleiri Greinar.

[María, 28.8.2007 kl. 15:31]

lýst brjálæðislega vel á þessar greinar ... kannski ég geti orðið íþróttakona núna - og skrái mig hér með í allt! ...já nema bíladæmið þarna því ég ferðast bara í strætó. Og langar því að bæta inn keppninni í því hver er kasstar lengst leiðarkerfi strætósins í þar til gerða ruslakörfu ... því þetta kerfi er bara rusl! Takk fyrir!

[gunnar rúnars (IP-tala skráð) 28.8.2007 kl. 19:26]

ég sting uppá "þjónustudeildarsímansþolinmæðiskeppni" keppendur hringja inn og fá svarið "þú ert númer 77 í röðinni, símtölum verður svarað í réttri röð" þeir sem halda út eftir aðstoð fá verðlaun.  Þeir sem enn muna hvað vandamálið er þegar aðstoðin berst fá aukaverðlaun.

[Dagmar, 29.8.2007 kl. 18:07]

Sammála með Finnana, þeir sem ég hef kynnst eru frábærir!! (og hafa klikkað drykkjuþol þó það komi kannski ekki málinu við...)  
En tengist þessi pirringur eitthvað smókleysinu eða ertu bara að nota tækifærið meðan allir halda að þú sért í fráhvarfi ...?

smá speki handa þér  alltaf gaman að þvi!

A little sincerity is a dangerous thing, and a great deal of it is absolutely fatal. Oscar Wilde

[Garún, 29.8.2007 kl. 20:02]

Takk kæra Dagmar.   Engin pirringur í gangi hér.  Ég er bara svona stöðugt.  En ég heyrði frábært orðtiltæki um daginn, það er svona " Á maður að þegja og virka heimskur? Eða tala og fjarlægja allan efa?"  Dásamlegt

[Álfhóll, 1.9.2007 kl. 09:37]

Garún mín góð! Góðar hugmyndir hjá þér sem oftar og e.t.v. leiðin til þess að ég fari að taka þátt í mótum.  Hingað til hefur botsja komist næst því að heilla mig - og þá ef hægt er að fá þá þjónustu að mér verði færður boltinn á milli þess sem ég kasta frá góðum hægindastól. 

En ég vil stinga að þér fleiri leiðum til þess að vinna með pirring:  Ein dull og seinvirk leið er að breyta því sem þarf í samfélaginu til þess að uppræta pirringinn.  Þetta er sú leið sem ég nota í vinnunni minni.

Aðra hugmynd fékk ég þegar ég heimsótti ég rammpólitískan vin minn um daginn sem er með hárfína tilfinningu fyrir því sem miður fer.  Hann hefur fundið sér ýmsar leiðir. Eina rakst ég á þegar  ég  brá mér á snyrtinguna hans.  Hann var búinn að koma sér upp bunka af fundargerðum bæjarstjórnar í bænum hans sem komið var fyrir við hliðina á klósettinu.  Veit ekki alveg hvort hann les þær á settinu til þess að næra pirringinn eða hvort hann notar þær sem skeinó til þess að fá útrás fyrir pirringinn.  Finnst síðari útfærslan skemmtilegri..............

Love

Vinkona þín