Meira drama takk

Ég ætlaði svo sem ekki að blogga um þetta mál, en því miður ég finn mig knúna til að skrifta og játa.  Ég undirrituð hef algerlega óviljandi og svolítið viljandi fylgst með sápuóperunni "Ráðhúsið" í nokkurn tíma og haft gaman af.  Fannst það vel leikið, með skemmtilegum leikfléttum og klippingin alveg æðisleg.  Karakterbyggingin góð, sá gamli geðveiki, maðurinn með hárkolluna, Ungi myndarlegi læknirinn, reiða konan, tilfinninganæmi maðurinn og svo mætti lengi telja. 

Já ég hef nefnilega fylgst mjög vel með þessum þáttum og haft verulega andstyggilega gaman af...eiginlega alveg þangað til í gær.  Þátturinn í gær var ekki góður!

Tvær verulega illa leiknar senur af annars frábærum leikurum og það var eins og leikstjórinn hefði engan áhuga á sögunni og framvinda var engin.  Eftir þáttinn sátum við kötturinn Emil hálf rugluð og vissum ekkert hver staðan væri.  Fyrsta senan sem böggaði mig var þegar karakterinn Villi Vil ætlar að halda blaðamannafund klukkan 13 en mætti ekki á hann fyrr en klukkan 14, nota bene blaðamannafundur sem hann boðaði.  Nú ok svo byrjaði blaðamannafundarsenan, ég sat spennt fremst á sófabríkinni og hélt niðri mér andanum .....

"já takk fyrir að koma, ég ætlaði nú bara að segja að það er ekkert frá að segja og ég ætla að halda áfram að tala við mitt fólk og bla bla bla bla!...."  Sagði Villi Vil og drakk vatn...arrrrgg þvílík vonbrigði, ekkert drama, engin spenna  EKKERT.  Ég fór að spá hvort að verkfall höfunda í Hollywood væri farið að hafa áhrif á Ráðhús þættina.  Jæjja þetta var ekki búið.  Næsta sena gerðist í Kastljós setti Ríkissjónvarpsins (sem er reyndar núna VarRíkissjónvarpið), og þar sat borgarstjórinn geðglaður og talaði um hversu góða stefnuskrá hann væri með.  Alveg sama hversu mikið mótleikari hans spyrillinn reyndi að spæsa upp söguna, ekkert virkaði og senan með annars ágætum leikurum var hálf máttlaus og laus við allt drama sem einkennt hefur þættina og skapað þeim vinsælda.  Það var reyndar eins og Óli F sem leikur borgarstjórann væri bara á annari plánetu og lék undir getu allan tímann.  Aðrir sem yfirleitt leika í þáttunum sáust ekki og saknaði ég þar reiðu konunnar (uppáhaldið mitt) Gísla Glaða og Hönnu Handy, einnig sást myndarlegi læknirinn með krullurnar og rauða bindið ekkert heldur og var þátturinn ekkert betri fyrir það.   En senuþjófur gærdagsins var samt án efa hún María Sigrún fréttamaður Rúv sem kom sá og sigraði þegar biðin eftir Villa var orðin löng.  

Ég vona að handritshöfundar þáttanna komist bráðum aftur í gírinn því ef þetta er það sem koma skal þá er ég hætt að horfa og stilli á skjá 1 í staðinn.   

 MEIRA DRAMA TAKK

kveðja Áhorfandi  

Athugasemdir

[Bros, 12.2.2008 kl. 14:04]

Brosið á bágt með að hemja sig núna, engist sundur og saman af hlátri og passar sig á því að brosa ekki neitt.  Snildin tær hjá þér Gullin, að vanda.

[Lilja Guðrún Þorvaldsdóttir, 12.2.2008 kl. 14:24]

Tek undir hvert orð gæti ekki verið  meira sammála,  hef trú á að verkfall handritshöfunda spili þarna e-hvað  inní  t.d saknaði ég sexmenninganna sem  mér finnst hafa staðið sig ágætlega.   Hugsa til þess með hryllingi ef verkfallið á eftir að standa í kannski 2 ár eða rúmlega það.  Þá er það bara Skjár 1 sem blífur. Kveðja lg

[Elisabet R (IP-tala skráð) 13.2.2008 kl. 01:45]

 

[Dagmar, 13.2.2008 kl. 09:21]

Heil og sæl kæra bloggvinkona ! mikið hef ég saknað þín .

Þú stendur þig vel í blogginu þegar þú kemst loks í gang... snilldarfærsla hjá þér. Sammála hverju orði, væri hægt að semja góða sápu út frá þessu... næsta áramótaskaup hefur svo að segja skrifað sig sjálft!

Hlakka til að lesa meira,

Knús, D

[Fran Miller, 14.2.2008 kl. 00:37]

Já þannig er nú það, mín kæra