SURVIVING ICELAND

Þetta finnst mér spennandi!  Mér finnst svo gaman þegar eitthvað er gert svona aðeins útúr norminu.  Hef alltaf haft lúmskt gaman af pokahlaupi, limbó og svona öðruvísi hlutum.  

Mig langar að skipuleggja leikana " SURVIVING ICELAND IN KREPPA"

Það sem að mér myndi langa til að gera er að það séu haldnir leikar hér á Íslandi til að sýna góða fólkinu á Alþingi hvernig við reynum að draga fram lífið.  Þá kannski væri minna af söngvum í pontu á Alþingi.   

1. Grein.    Þáttakendur koma með greiðsluseðlana sína sem hafa hækkað umtalsvert og launaseðla síðasta mánuðar.  Fólki verður skipt niður á borð, 5 á borði og svo er spilað póker með greiðsluseðlunum.  Þeir greiðsluseðlar sem hafa hækkað lítið eru hundar og talan sem þeir enda á t.d 43.456 kemur þá í staðinn fyrir 6. Þeir greiðsluseðlar sem hafa hækkað um tugir þúsunda eru að sjálfsögðu mannspil. Launaseðlar eru ásar og skiptir þá engu máli hvaða sort.   Íbúðarlánasjóður er hjarta, bílagreiðsluseðlar eru spaðar, Fasteignagjöld eru lauf og Hiti/rafmagn er tígull.  ATH.  ef að það eru ekki launaseðlar til vegna  vinnumissi er hægt að nota eitthvað frá vinnumálastofnun.   Sigurvegarinn fær að sleppa við að borga greiðsluseðlana þennan mánuð.  Keppt verður bara í RÖÐ og PÖR. 

2.Grein.   Þáttakendur fá 5.000 krónur hver og eiga að kaupa inn fyrir fjögra manna fjölskyldu í matarbúð fyrir heila viku.  Reglurnar eru að það verður að gera ráð fyrir morgunmat og kvöldmat.  ATH. Bannað að kaupa núðlur.  Sá sem sigrar fær ársbyrgðir af grjónagraut í pakka og 20 prósent afslátt af mjólk út árið ef keypt er mjólk á síðasta söludegi.

3.Grein.  Fólk prentar út yfirlit af tékkareikningi sínum síðasta mánuðinn og með eingöngu blað og penna og eitt símtal í boði þarf það að geta reiknað út ÖLL þjónustugjöld, millifærslugjöld, umsýslugjöld og kostnað til bankans sem það greiddi fyrir að "Leyfa" þeim að geyma peninginn sinn ef einhver er! Það þarf síðan með einu símtali að geta hringt í þjónustufulltrúann sinn og fá útskýringu sem það skilur á hinum ýmsu útgreiðslum sem útlagðar eru í heimabankanum sem "millf.098346487-7690-43" og bankinn áskilur sér að taka. Sigurvegarinn fær ekki neitt nema höfuðverk og kvíðakast yfir gjöldunum.  ATH erfið andleg þraut! 

4.Grein.  Fólk fær að velja fjórar bensínstöðvar og fær 5.000 krónur til að setja sem mest bensín á bílinn sinn.  Fólk mun þurfa að velja og skoða allar auglýsingar sem byrja á "-5 krónur á fyrstu tvo lítrana" eða "-2 krónur ef þú dælir sjálfur fyrstu 10 lítrana" og svo framvegis.....Sigurvegarinn fær fyrstu 8 lítrana á -3,5 en borgar síðan +4 það sem eftir er!

Keppnin endar í málþófi varðandi síhringi kort (sem eru víst ekki til) og hvernig stendur á því að í mánaðarlok ýmsar færslur eru teknar af tékkareikningi sem hefðu átt að fara mörgum dögum áður og þegar þær fara þá bætast við á þær FIT gjald og kaffibolli sem maður keypti þremur dögum áður á 380 krónur er komin yfir þúsundkallinn með FIT gjaldi. 

Vill einhver vera með?  Vinsamlegast athugið að flest ykkar eruð að keppa í flestum af þessum greinum nú þegar svo endilega sláið til og reynum að hafa gaman af þessu.  

p.s Það kostar 28.000 krónur að taka þátt í hverri grein fyrir sig og fer í viðbótarlífeyrissparnað hjá Alþingismönnum. 

Ólympíuleikar atvinnulausra

Athugasemdir

[Halldór Sigurðsson, 4.4.2009 kl. 12:39]

Já ég vil taka þátt - en - má ég borga innritunargjaldið á raðgreiðslum til tíu ára ?

[Linda Linnet Hilmarsdóttir, 10.4.2009 kl. 18:00]

Gleðilega Páska og ljúfar notalegar kveðjur

[Edda Björk (IP-tala skráð) 14.4.2009 kl. 14:40]

Ha ha ha ha alltaf jafn fyndin :-) Gleðilega Páska og reynum að fara að hittast.